មណ្ឌលគិរី៖ ដំណាំ៤ប្រភេទដែលមានដូចជា ដំឡូងបារាំង ស្ពៃក្តោប ផ្លែប័រ និងក្រូចផាសិន ហាក់កំពុងមានទីផ្សារនៅក្នុងខេត្តមណ្ឌលគិរី ដែលបានធ្វើឲ្យជីវភាពប្រជាពលរដ្ឋដែលប្រកបរបរកសិកម្មនៅក្នុងខេត្តនេះមានជីវភាពកាន់តែល្អប្រសើរ។ នេះបើតាមការឲ្យដឹងពីក្រសួងព័ត៌មាននៅថ្ងៃទី២៥ ខែមីនា ឆ្នាំ២០២២នេះ។

អភិបាលក្រុងសែនមនោរម្យ ខេត្តមណ្ឌលគិរី លោក ហៀក សុផាន បានឱ្យដឹងថា ខណៈខេត្តមណ្ឌលគិរី ជាខេត្តមួយដែលមានសក្តានុពលលើវិស័យទេសចរណ៍ ខេត្តនេះក៏អំណោយផលលើវិស័យកសិកម្មផងដែរ ដោយសារតែដីមានជីជាតិគ្រប់គ្រាន់ ធ្វើឱ្យបន្លែនៅទីនេះលូតលាស់បានល្អ ជាពិសេសមានរសជាតិឆ្ងាញ់ជាងបន្លែដែលដាំនៅបណ្តាខេត្តដទៃទៀត។

លោកបានបន្តថា ដំណាំដែលប្រជាពលរដ្ឋដាំដុះបានល្អ និងទទួលបានទិន្នផលខ្ពស់រួមមាន ដំឡូងបារាំង ស្ពៃក្តោប ផ្លែប័រ និងក្រូចផាសិនជាដើម ដែលជាដំណាំកំពុងមានត្រូវការខ្ពស់ពីអតិថិជន ដោយសារតែជាផលិតផលដែលដាំដុះតាមបែបធម្មជាតិ មិនមានសារធាតុគីមី ដែលប៉ះពាល់ដល់សុខភាពអ្នកបរិភោគ។

លោកបន្ថែមថា៖ «នៅពេលបច្ចុប្បន្ននេះ នៅខេត្តមណ្ឌលគិរីមានសក្តានុពល គឺផ្នែកកសិកម្មគឺយើងបានដាំដំឡូងបារាំង គឺចម្លែកដែរនៅប្រទេសកម្ពុជាយើង មិនមានដីណាដែលដាំដំឡូងបារាំងហើយបានភោគផល តែនៅមណ្ឌលគិរីយើងបានដាំដំឡូងបារាំង ហើយយើងមានសក្តានុពលបន្លែដែលឆ្ងាញ់ដូចជាស្ពៃក្តោប ហើយយើងមានផ្លែប័រ យើងមានក្រូចផាសិនហ្នឹងក៏មានរសជាតិឆ្ងាញ់ដែរ គឺមានរសជាតិមួយប្លែកខុសពីគេ នេះជាសក្តានុពលដ៏ល្អនៅក្នុងខេត្តមណ្ឌលគិរីយើងនេះ»។

លោកក៏បានបញ្ជាក់ផងដែរថា ចំពោះដំណាំដំឡូងបារាំងប្រជាកសិករអាចលក់បានក្នុងតម្លៃចាប់ពី៥ពាន់ ទៅ៦ពាន់រៀល ក្រូចផាសិនមានតម្លៃ ៨ពាន់រៀល ស្ពៃក្តោបមានតម្លៃ ៥ពាន់រៀល និងផ្លែប័រ មានតម្លៃចន្លោះពី១២០០០ រៀល ទៅ១៥០០០រៀល ក្នុងមួយគីឡូក្រាម៕